नेपाली हास्यव्यङ्ग्य अनलाइन पत्रिका

तेजविलास अधिकारी :

चल्मलाइरहेछ हिजो आज
एउटा निर्जीव आकृति
छाप्रेली बस्तीमा
भयङ्कर आतङ्क बनेर
के त्यो
विनाशक यन्त्रमानव हो ?
हो वा
कुनै एउटा
प्राचीन रूढिको
भयानक दैत्य
अझ भनौं
मानवता डढाउने
चैते डढेलो
जसमा देखिदैन
कुनै केही संवेदना
शून्य मानवताको कोणबाट
गजव लाग्ने आकृति
देखाइरहेछ अनौठो गतिविधि
आह्वान गर्दै मुर्दा शान्तिको
ओढेर पवित्र ध्वजा
केही थान
अन्धभक्तहरू
भनिरहेछन् जय जय
तथाकथित प्रभुको जयगानसँगै
मिठ्याइ रहेछन् स्याले जिब्रो
समानान्तर
सुनिन थालेको छ
सानो भएपनि आवाज
चीत्कारमय बस्तीको
यतिबेला
चुपचाप छ
राष्ट्रिय भत्ता आयोग
दवावमा गुमाइरहेछन् विवेक
न्यायका वितरकहरू
केवल मूर्तिजस्ता मात्र
कलम ढालेर
चुपचाप
चुपचाप छन्
प्रज्ञाहरू
यतै कतै
भेटिन्छन् दोहोरी साँझमा
केही युवा सांसद
साटिरहेछन् विजयी भाव
छाडेर समसामयिक विषय
थप केही आएको छैन
सूचनाजीवीहरूबाट
तोडमोड गरेर तथ्य
प्रसारण भइरहेछन्
ब्रेकिङ् न्यूज
तथापि
सोकेसका
समानुपतिक सांसद
छन् चुपचाप अभियान मै
कुनै प्रतिक्रिया छैन
लगाइ जिब्रोमा ताल्चा
बिर्सिएर निकट विगत
नबोल्ने वाचा लिएजस्ता
एउटा निर्जीव आकृति सामुन्ने
लल्याकलुलुक छन्
उसकै लाचार छायाजस्तै
सुन्दैन उनीहरूको कान
देख्दैन उनीहरूको चक्षु
मात्र हो मांसस्वरूप
नजिकै फैलिएको छ
उजाडिएको बस्तीमा
चरम चीत्कार
श्वेतआतङ्क अगाडि पनि
नानीहरू खोजिरहेछन् पुस्तक
खोजिरहेछन् कलम
शायद
खोजिरहेछन्
मौलिक अधिकारका सूची
जहाँ
खोसिएको बेला पनि
न्यूनतम् अधिकार ।

०००
चितवन