नेपाली हास्यव्यङ्ग्य अनलाइन पत्रिका

नयाँ नेपाल बन्दैछ प्रतीक्षा मात्र गर्नुहोस्
नेपालकै नाम फेरी नयाँ नेपाल राख्नुहोस् ।
पुरानाको काम छैन नयाँ नेपालमा अब
पुराना जति जे जे छन् ती सबै चीज फोर्नुहोस् ।
पुराना पुल भत्काई बाटा बन्द गराउनोस्
बूढाखाडाहरूलाई गोली हानेर ढाल्नुहोस् ।
फसादको जरो धर्म यस्को दाँत उखेल्नुहोस्
कुनै संस्कृति चाहिन्न पोली धोई पखाल्नुहोस् ।
शिक्षा पुरानो चाहिन्न नयाँ शिक्षा निकाल्नुहोस्
क्रान्तिकारी बनोस् शिक्षा क्रान्तिकै वेद रच्नुहोस् ।
क्रान्तिकारीहरू मात्र ज्ञाता घोषित गर्नुहोस्
प्रमाणपत्र बाँडेर प्राध्यापन गराउनोस् ।
गरीबको मुलुकमा धनी खतम पार्नुहोस्
सर्वहारा बनून् सारा यही नारा लगाउनोस् ।
उद्योगी अनि बेपारी दुवै शोषक जान्नुहोस्
दुवैलाई देशबाट लखेटेर भगाउनोस् ।
पत्रकारहरूबाट आफ्नै गुण गवाउनोस्९भनाउनोस्०
जो मान्दैनन् ती सबैको राम्रै ठेगान लाउनोस् ।
दाता देशहरूबाट लिन रोक लगाइयोस्
नपुगे जनता भोकै बस्न वाध्य गराइयोस् ।
सारा नियम यो तल्लो जनतामा लगाइयोस्
नेताले जे गरुन् माफ हुने नियम बाँधियोस् ।
विदेशमा काम गर्न नदिने नीति राख्नुहोस्
गोर्खा भर्ती केन्द्र बन्द गरी यो काम थाल्नुहोस् ।
सर्वहारादेखि भिन्न पार्टी बन्द गराइयोस्
यो देश हो श्रमिकको ती मात्रै बस्न पाइयोस् ।
व्यक्तिले सम्पत्ति राख्ने अधिकार हटाइयोस्
भएको जति खोसेर राष्ट्र जिम्मा लगाइयोस् ।
सबैलाई काम दिने राष्ट्रले नै गराइयोस्
यसैको ढुकुटीबाट बस्ने खाने मिलाइयोस् ।
अनि पो साँच्चि नेपाल नयाँ नेपाल बन्दछ
त्यसलाई ठोक्नु पर्छ जल्ले होइन भन्दछ ।