नेपाली हास्यव्यङ्ग्य अनलाइन पत्रिका

जनता

खल्वाटको टाउकोमा केसको महत्व हुन्छ,
सुन्दरता प्रतियोगितामा भेषको महत्व हुन्छ,
जनता त फाटेका तास भइसकेका छन्, हजुर–
यहाँ चुनावमा मात्र राष्ट्रियता र देशको महत्व हुन्छ ।

अन्तर

दुई आँखाको मिलन हुनै सक्दैन
किनकि बीचमा नाकको डाँडी छ ।
फोस्रो आडम्बर देखाएर के भो ?
जनताको वास्तविकता त उही कोरा र खाँडी छ ।

काठमाण्डौ

कथा–व्यथा छरिएका छन् चारैतिर
फोहरका थुप्राहरू बडाउँदै
काठमाण्डौ !
हुनेहरूका लागि सधैँको सहकाल
नहुनेहरूका लागि दिनैपच्छिे अनिकाल
यो देशमा दुईवटा काठमाण्डौ छन्–
एउटा राजधानी काठमाण्डौ !
अर्को गरिबधानी काठमाण्डौ !!

प्रजातन्त्र

एकातिर, प्रजातन्त्रको भात छड्कीरहेको छ,
अर्कोतिर, नारा ओइरिएर सडक पड्कीरहेको छ,
डाडुपन्यौ हुनेहरू मख्ख छन् यहाँ
जनता खलाँतीजस्तो पेट लिएर
भोकभोकै झुप्राहरूमा तड्पीरहेको छ ।

अभिवादन

एकातिर, कारैकारको ट्राफिक जाम छ ।
अर्कोतिर, ढाकरै ढाकरको उरुङ् लाम छ ।
भनाइ र गराइमा फरक देखियो ए ! प्रजातन्त्र !!
तेरो वी.पी.लाई ‘जयनेपाल’ र
पुष्पलाललाई ‘लालसलाम’ छ ।

धेरै भए

यहाँ, नीतिभन्दा नेता धेरै भए
टाउकाभन्दा फेटा धेरै भए ।
पुस्तकभन्दा गाइड धेरै भए
प्राविधिकभन्दा साइड धेरै भए ।
अन्नभन्दा घुन धेरै भए ।
कानभन्दा सुन धेरै भए ।
गुनभन्दा बैगुन धेरै भए ।
त्यसैले,
जागिरभन्दा भनसुन धेरै भए ।

हाल : मन्थली, रामेछाप