नेपाली हास्यव्यङ्ग्य अनलाइन पत्रिका

दुई फुटी चार भयो चार फुटे आठ
फुटैफुटको फुटेरामा लुटेराको आँट
राजनीतिज्ञहरूसँग तस्करको साठगाँठ
अनि किन नगरोस् त पार्टी खोल्ने आँट ।

नाम पाउने दाम पाउने, पाइने ठूलो पद
पद जस्तो संसारमा अरु के नै छ र !
कमाउने ठाउँमा जाने सवको हुन्छ छाँट
अनि किन नगरोस् त पार्टी खोल्ने आँट ।

टाउको भन्दा फेटा धेरै फेरी–फेरी लाउँछौं
जनता भन्दा नेता धेरै हामी यही पाउँछौं
भित्र किरा परे पनि बाहिर देखाउने दाँत
अनि किन नगरोस् त पार्टी खोल्ने आँट ।

भाषणको खेती यहाँ जता पनि चल्छ
हाने मर्छ, बोले टर्छ कसले के पो गर्छ
आश्वासन दिए पुग्छ यथार्थमा ढाँट
अनि किन नगरोस् त पार्टी खोल्ने आँट ।

स्यादुल, धादिङ
moon.sa2011@gmail.com