नेपाली हास्यव्यङ्ग्य अनलाइन पत्रिका

एउटा झ्याली पिटेर
प्रभुकै गीत गाउँछ
अर्को रयाली हिँडेर
प्रभुकै तारो बनाउँछ
प्रभुलाई देख्न मन लाग्यो
प्रभुलाई भेट्न मन लाग्यो
अपार रहेछ तिम्रो शक्ति
महान् रहेछ तिम्रो भक्ति
नहरमा छौ कि नाउँमा छौ
भन प्रभु तिमी कुन ठाउँमा छौ ?

ढल्नै लागेको सरकार पनि
ग्याम्मै नढल्ने
चल्नै लागेको हड्ताल पनि
ठ्याम्मै नचल्ने
माने प्रभु तिम्रो शक्तिलाई
माने प्रभु तिम्रो भक्तिलाई
भोले हौ कि मुक्तिनाथ
डोले हौ कि जुक्तिनाथ
ब्रह्माजी हौ कि शङ्कर
शर्माजी हौ कि भयङ्कर
शहरमा छौ कि गाउँमा छौ
भन प्रभु तिमी कुन ठाउँमा छौ ?

तरकारीमा होस् वा तेलमा
तिम्रै बोली लाग्छ
खैराते तिम्रो वाणी पनि
सरकारलाई गोली लाग्छ
कुन रुपमा छौ, कुन भेषमा छौ
भन प्रभु तिमी कुन देशमा छौ ?

सोध्नै मन लागेको कुरा
एउटालाई फालेर अर्कोलाई राख्ने
एउटालाई पालेर अर्कोलाई जाक्ने
गजबको तिम्रो अट्काउ छ
मान्नेलाई सम्बन्ध गाढा
नमान्नेलाई सधै टाढा
प्रभुको गजबको लट्काउ छ
तर जहाँ पनि प्रभुकै नाउँ छ
यहाँ तिम्रो व्याज छ कि साउँ छ ?
एउटा फाली अर्कोलाई ल्याउने
भन प्रभु यसमा तिम्रो के दाऊ छ ?

प्रभु भेट्न मन लाग्यो
नगरमा छौ कि गाउँमा छौ
भन प्रभु तिमी कुन ठाउँमा छौ ?