नेपाली हास्यव्यङ्ग्य अनलाइन पत्रिका

समय र जमाना अनुसार चल्न नसकेमा मानिस पछाडि पर्छ । सबैको सामु लाजले शिर बास भै झुकाएर हिँड्न विवश हुनु पर्छ । आफैलाई हिनताबोध भएर महिनौ दिनसम्म सबै सामु शिर ठाडो पारेर हिड्न पनि अप्ठ्यारो पर्छ । वर्षौं वर्षसम्म अनेकानेक बल बुताले बनाएको इज्यत क्षणभरमा चकनाचुर हुन्छ ।

विवाहको मौसम आएपछि उमेर पुगेका छोरा छोरीको वैवाहिक लगनगाँठो बाँधिदिएर आफ्नो जिम्मेवार पूरा गर्न पाए धर्म कमाइएला भनेर विचार गरिरहनु भएको छ भने अब नयाँ लमीको जन्म भएको छ । त्यो लमीलाई फकाउनु पनि पर्र्दैन । यस प्रकारको वर या वधु चाहियो भनेर बायोडाटा दिइरहनु पर्दैन । सत्र गाउँ डुलेर निराश हँुदै फर्कनु पनि पर्दैन । आजको साइत खराब भयो भनेर अभुश दिनको बयान पनि गरिरहनु पर्दैन । यस्तो लठेब्रोलाई कसले देला चेली भनेर आप्mनै सन्तानको नालीबेली कहनु पनि पर्दैन । लौ न लमी ज्यू मेरो यस गोज्याङ्ग्रेलाई एउटा जोडी खोजिदिनु प¥यो । न घर गरी खान्छ कि लौ न हजुर तपाईले कतै मिल्दो जोडी देख्नु भएको छैन ? लमीलाई फकाउने फुल्याउने काम पनि गर्नु पर्दैन ।

बत्तीस लक्षणयुक्त भएका चेली नभए पनि एकतीस लक्षणयुक्त छोरीको विवाह गर्न छोरी अनुसारको ज्वाईं खोजिरहनु भएको छ । यति दाइजो दिउँला, मागेको अन्य सर्त पनि पूरा गरिदिन्छु भनेर वाचा कबोल गर्दै नयाँ ठाउँमा कुटुम्ब जोड्ने तरखर गर्दागर्दै पनि हैरानीमा पर्नु भएको छ भने अब कुनै डर चिन्ता नलिनु होला किन भने अब नयाँ लमीको जन्म भइसकेको छ । तपाईंको मनमा उब्जिएका सबै समस्याको समाधान सजिलै गरिदिन सक्छ । तपाईंले कुनै पीर चिन्ता मान्नु पर्दैन । कोट लाउने कोही पनि आउँदैनन् । स्टकोट लाउनेसँग विवाह गर्दिन भनेर अर्मरिएर बुढीकन्या बस्ने छोरी चेली पनि नयाँ लमीको माध्यमबाट सजिलै पराई घरमा जाने मेलोमेसो मिलाई दिन सक्छन् ।

कुमारी कन्याको त के कुरा भयो र ! बाह्र छोरा तेह्र नाति भएका हजुरआमा, हजुरबुवा पनि भर्खर सोह्र पुगेर सत्र लागेको ठिटा ठिटी झैं फुरूङ्ग फुर्किएर नयाँ जरजम गरेको तपाईं हाम्रो सामु बाक्लै देखिन थालेको छ । सबैको हितकारक नयाँ लमी को होला मलाई पनि अति आवश्यक परेको छ भनेर खोजीमा हुनुहुन्छ भने सायद तपाईको पोल्टामा पनि त्यो नयाँ लमी आइसकेको हुनुपर्छ । त्यो हो सञ्चार प्रविधिसँग भित्रिएको आधुनिक साधन मोवाइल । वर्तमान अवस्थामा मोवाइलले लमीको काम कति गरेको छ तपाई सहजै अनुमान लगाउन सक्नुहुन्छ । एक जना हजुर बुवा नयाँ लमीको कारण मेरी गृहलक्ष्मी अर्मठिएको भुसतिघ्रे ठिटो च्यापेर शहर पस्यो । बुढेसकालमा आएर मेरो घरजम बर्वाद भयो । कम्तीमा पनि मेरो जायजेथा यानेकी जारी वापतको रकम उपलब्ध गराइदिई हदैसम्मको कानुनी कारवाही गरिदिनु भनि न्यायालय धाउन विवश छन् ।

नयाँ लमीको कारण मेरी अप्सरा जस्ती सुन्दरी र मुटुको धड्कनले कथित दलितसँग नारिएर दैलो नाघी भन्दै बाबु पीरले मरिच झै चारिएको पनि देखियो । ज्ञान आर्जनको खातिर ज्ञानालयमा पठाएका आप्mना छोराछोरी फलामको ढोका मानिने परीक्षा नै नदिई ज्ञानालयलाई प्रेमालयमा रूपान्तरण गरेर दुनियालाई गफ गर्ने विषय बनाएर गएको पनि तपाई हाम्रो सामु घाम जतिकै छर्लङ्ग छ । विद्यालयका गुरू गुरूआमाहरू पढाउन छाडेर कसरी नयाँ लमीको प्रयोग गर्ने भनेर सिकाउनमा नै व्यस्त हुन्छन् कि क्या हो भन्दै अभिभावकहरू क्रुद्ध हुन्छन् । माध्यमिक तहमा पढाउनु हुने गुरूलाई तपाई विद्यालयको प्रगति के छ भनेर सोध्दा नाम नबताउने सर्तमा भन्नु भयो “अरू त खासै प्रगति गर्न सकिएको छैन । नयाँ नया शिक्षण विधिको प्रयोग र शैक्षिक सामग्रीको प्रयोग गरे पनि उल्लेख्य रूपमा प्रगति गर्न सकिएन तर नयाँ लमीको कारण पाँच जोडी त जोडी बाँधेर गइसके अब पाँच सात जोडी जाने तरखरमा छन् ।

नयाँ लमीले सबैलाई सजिलो भन्दा सजिलो बनाइदिएको छ । सात गाउँ डुलेर दश जोर जुत्ता फटाउन्जेल पनि लमीको जिम्मेवारी पूरा गराउन नसकेर हैरान भएका लमीहरूले अब टेन्सन लिनु पर्दैन । अर्को कुरा लमीको आशामा बसेर जीवनको नयाँ अध्याय सुरू गरौँला भनेर बसेका नव यौवना युवतीहरूले पनि अव लमी आउने बाटो हेर्दा हेर्दै आँखा दुखाउनु पर्दैन । नयाँ लमीको प्रयोग गरेर घरमा बसी बसी आप्mनो जीवन साथी आफै छान्न सक्नुहुनेछ । वैवाहिक सम्बन्धमा गाँसिएर पनि छ महिनासम्म लाजसरम मानेर आप्mनो जीवन साथीसँग दिल खोलेर बोल्न पनि हिच्किचाउने लजालु स्वभाव भएकाहरूको लाज सरम पनि संविधान बनाउन नसक्ने नेताको झै सजिलै पच्न सक्छ ।

तपाई जीवनमा कति जनासँग वैवाहिक सम्बन्ध गाँस्न मन छ, त्यसको धोको सजिलैसँग पुर्याइ दिनेछ नयाँ लमीले । यसलाई सकेसम्म सदुपयोग गर्न भने जान्नुु पर्दछ । तपाईको गृहलक्ष्मीले टेन्सन दिएर आधा जिउ बनाएको छ भने एउटा नयाँ लमीको व्यवस्था गरिदिनुहोस् त तपाईको सबै टेन्सन साफ हुन्छ । नयाँ लमीको सदुपयोग गर्नुहुनेछ । तपाईं पनि नयाँ लमीको सदुपयोग गर्नुहोस् है । नयाँ वर्षको सुरूवातसँगै म त लागे नयाँ लमीको प्रयोग गरेर जीवनको नयाँ उमङ्ग भर्ने तर्खरमा । तपाई के विचार छ ? तपाई पनि नयाँ लमीको प्रयोगमा भएभरको बलबुता लगाएर लागि पर्नुहोस् है । तपाईले यसको सदुपयोग गर्नुहुनेछ भन्ने म सतप्रतिशत विश्वस्त छु । साथै तपाईका हितैषी नातागोता इष्टमित्रहरूलाई पनि यसको महत्व बुझाउनु हुनेछ भन्नेमा कुनै दुविधा छैन । नयाँ लमीको जय होस् ।
मन्थली, रामेछाप