नेपाली हास्यव्यङ्ग्य अनलाइन पत्रिका

आफ्नो माग र भाग खातिर निकै आक्रोश पोखे पनि
भन्डाफोर गरौँ भनी सब जुटे पक्का विपक्षी बनी ।
नाघी नैतिक मान्यता अझ गिरी गाली गरे, कुर्लिए
सत्तासीन कठोर, क्रूर छ भनी मान्छेहरू उर्लिए ।।

हामी एक भई विरोध नगरे ढल्दैन सत्ता भनी
लागे एक भएर सङ्गठनमा झन् एक ढिक्का बनी ।
थोरै भो मनको मुटाव दलमा नेतृत्वमा को हुने
मोर्चामा कसले ठुलो जश लिने, दायित्व कस्तो हुने ।।

पासो साम र दाम, भेद अथवा फाले भने दण्डको
चोर्छन् रे मनशाय शासकहरू झुक्याउँदै झुण्डको ।
आफैँभित्र दरार हुन्छ दलमा गन्तव्य सत्ता हुने
पाएमा पद मौन भै पछि हटी सानन्द खुट्टा छुने ।।

हड्डी खातिर लड्दछन् कुकुर यी उस्तै छ नेता गण
एकै व्यक्ति बनेर राम पहिले बन्ने छिटो रावण ।
पैसा, स्वार्थ पदीय लोभ अनि यो सत्ता मिले जे पनि
नेता छोड्न तयार हुन्छ सजिलै स्वार्थी र लोभी बनी ।।

नेताको पछि लाग्छ मानिस सधैँ लड्ने र मर्ने तर
नेता शासक हुन्छ फेरि जनता मानेर बस्छन् भर ।
हामी मात्र भर्याङ हौँ कि जनता नेताहरू उक्लिने
हामी भै ‘हनुमान्’ सदैव करुणा मिल्ला भनी धाउने ।।

सत्ताभित्र भए समाहित हिजो विज्ञप्ति छाप्नेहरू
ऐले मस्त तिनै प्रदक्षिण महाँ पैले सराप्नेहरू ।
भेट्टाए कमिला भुली सब कुरा रत्तिन्छ मिष्ठान्नमा
मान्छे गर्न अभीष्ट पूर्ण सजिलै लाग्छन् यशोगानमा ।।
बैतडी, हाल– सुर्खेत