नेपाली हास्यव्यङ्ग्य अनलाइन पत्रिका

आज एकाबिहानै प्रणय दिवश दैलामा आइपुगेपछि ण संग जम्काभेट भयो ! प्राय: बिरलै प्रयोगमा आउने अक्षर तीनधर्के ण हो ! गोरुसिंगे ञ लाई पूर्ण बिस्थापित गरेपछि निउरीमुन्टे न का गिद्दे आँखा तीनधर्के ण तिर पनि सोझिन थालेकोले त्यस्तो भएको हो ! निउरीमुन्टे न ले यदाकदा नाकथोप्ली ङ को ठाउँ पनि लिएको भेटिन्छ ! यसरी हाम्रो नेपाली बर्णमालामा निउरीमुन्टे न ले आफ्नो साम्राज्य बिस्तार गरिरहेको छ ! प्राण लाई बोलीचालीमा प्रान भनिन्छ ! बाण लाई बान र प्रणय दिवश लाई प्रनय दिवश बोलिन्छ ! यदि ङ, ञ र ण लोपोन्मुख बनस्पति हुन् भने निउरीमुन्टे न बनमासा झार हो ! बनमासाले बनलाई गाँजेर सखाप पार्छ, तर आफ्नो उपस्थितिले फिका हरियाली भने ज्युँदै राख्दछ ! अरु खतरनाक झारलाई ढिम्किन नदिने काम पनि गर्दछ ! त्यस्तै ङ, ञ र ण को ठाउँ लिएको न ले पनि बिभिन्न मौकामा मध्यस्थको भूमिका खेल्दछ ! मानिलिउँ निउरीमुन्टे न लाई चोरी हानेर हातभाँच्यो ल ले तीनधर्के ण को ठाउँ कब्जा गर्यो ! अब यस्तो फसाद पर्छ: गणित= गलित हुन्छ ! प्राण= प्राल र बाण= बाल हुनजान्छ ! प्रणय दिवश त प्रलय दिवश पो..? हत्तेरीका ! सकेसम्म तीनधर्के ण सधैं बाँचीरहोस् ! त्यो नभए बरु निउरीमुन्टे न ले नै राज्य गरोस्, कमसेकम प्रनय दिवश त हुन्छ ! त्यो हातभाँच्यो ल लाई चाहिं तीनधर्के ण को ठाउँमा ढिम्किन खोज्यो भने त्यै निउरीमुन्टे न ले ब्लक् गरोस् ! एकबारको जिन्दगी हो ! प्रणय दिवश नै प्रलय दिवश हुन गो\’भने कम्ता टेन्शन हुन्छ त यार ! सन्त भ्यालेन्टाइन बाजेका ठुला दुखले आर्ज्याको प्रणय दिवश हो, हातभाँच्यो ल लाई चेतना भया ! तीनधर्के ण को… जय !
प्रणय दिवशको सुअवसरमा यहाँहरुको प्रेम-जीवन स्वस्थ, तन्दुरुस्त र दिर्घजिवी रहोस्, हार्दिक शुभकामना छ ! प्रेम प्रेम सब कोई कहे -प्रेम ना जाने कोय ! ढाई अक्षर प्रेम को -पढे से पंडित होय ! बोलो तीनधर्के ण को…..जय !

गोरखा