डिल्लीप्रसाद मूलतिहुनजिज्ञासा
कोही सुत्दछ रातमा सडकमा कोही भने खाटमा
के चैँ भिन्न रहन्छ निष्क्रिय भई लढ्दा तिमी घाटमा । {{read_more}}
आफ्नै सन्ततिमा विभेद यसरी गर्छिन् र आमा कुन ?
लौ तिम्रै प्रतिपक्षमा म उभिएँ लल्कार मेरो सुन ।।१।।
बेला छैन लगाइदिन्छ मनले यी हातमा हत्कडी
बेला किन्न गएँ सबै पसलमा पाएँ विदेशी घडी ।
के के खानु र लाउने विविध छन् चिन्ता धनीका यही
चिन्तामात्र दियो भने त रुपिँयाभन्दा गरीबी सही ।।२।।
साठी वर्ष छ आयु जान्दछ कहाँ पृथ्वीभरीका कुरा ?
छोडी देश युवा विदेश नगए चल्दैन रे पाखुरा ।
आस्था, चिन्तन, धर्म, मर्म नबुझी सम्झ्यौँ सधैँ खेलझैँ
ढुङ्गाले पनि देवता बनिसक्यो बन्दैन मान्छे अझैँ ।।३।।
केही नै महिना पिछे रगत यो फेरिन्छ भन्छौ तर
हेर्छौ जात भने विकास कसरी होला र हाम्रो स्तर ।
थातीमा सुख किन्न छैन उसको केही धरौटी दिन
पृथ्वी गोल भए यहाँ झुपडिमा घुम्दैन रोटी किन ??।।४।।
नेपाली शिशु जन्मजात ऋणमा डुब्छन् भने ईश्वर
हाँसोको कति मूल्य हो ? म तिरुँला सरकारलाई कर ।
प्रेमी ईश्वर हो र फूलहरू यी चिठ्ठी पठाएँ तर
मेरो आँगन भो उजाड अब ता देऊ कुनै उत्तर ।।५।।
