नेपाली हास्यव्यङ्ग्य अनलाइन पत्रिका

आफ्नै घाँटी आफ्नै माला जति लगाए पनि भयो
आफ्नै हात र आफ्नै गाला जति बजाए पनि भयो ।

डाडु पन्युँ आफ्नै हातमा भएपछि कसको के लाग्छ
जे जे जाला पेटमै जाला जति खन्याए पनि भयो ।

आयोजक उहाँ अनि प्रमुख अतिथि पनि उहाँ नै
आफ्नै बत्ती आफ्नै पाला जति जलाए पनि भयो ।

आफ्नो आलोचनाको आ पनि सुन्न सक्नुहुन्न उहाँ
अरूमाथि शब्दका भाला जति चलाए पनि भयो ।

कसैले तपाईं भनोस् नभनोस् हजुर भनाई माग्न
आफ्नै साली आफ्नै साला जति कजाए पनि भयो ।

लुतो भएकाले मात्र लुतो हुनुको आनन्द पाउँछ
आफ्ना नङ्ग्रा आफ्नै छाला जति कन्याए पनि भयो ।

बुटवल