नेपाली हास्यव्यङ्ग्य अनलाइन पत्रिका

चुनाव हुने खबर चल्यो, फेरि झेल हुन्छ होला
पहिले जस्तै मतपत्र, च्यात्ने खेल हुन्छ होला

धेरै मुख रसाउने छन्, भोट र भोज देखेपछि
भतेर पाक्छ भान्साभित्र, मासु सेल हुन्छ होला

काममा सिन्को न भाँचे नि, लठ्ठ पार्ने भाषणमा
फेरि युरोपतिर जस्तै, कुद्ने रेल हुन्छ होला

साना ठूला सबै दलका, घोषणाका पत्र पढ्दा
अरब खाडी भन्दा सस्तो, ग्याँस र तेल हुन्छ होला

दलका सिद्धान्तलाई कठै, खोपीतिर थन्काएर
नदी तटका दुई किनार, फेरि मेल हुन्छ होला

महँगी छ अति धेरै, व्यवस्थापन मिलाउँदा
परार भन्दा अझै ठूलो, पैसाको भेल हुन्छ होला ।

०००

कालिका ६, चितवन