नेपाली हास्यव्यङ्ग्य अनलाइन पत्रिका

चिरञ्जीवी दाहाल :

तलव भत्ता मात्र मिल्दा, मरौंजस्तै लाग्छ
मौका छोपी रित्तो बाकस, भरौंजस्तै लाग्छ

न त संस्कृत पढ्नु पर्ने, न अङ्ग्रेजी चाहिने
त्यसैले त राजनीति, गरौंजस्तै लाग्छ

बानेश्वरको सभाहलमा, भिडभाड हुँदा
प्रमोशन भै सिंहदरबार, तरौंजस्तै लाग्छ

खुरिखण्ड भइसकेको, खर्कतिर होइन
आइ सी डलरको चरन, चरौंजस्तै लाग्छ

जुन दलको टिकटमा, चुनाव जिते पनि
जागिर मिले अर्को घर, सरौंजस्तै लाग्छ

नयाँ ठूला योजनालाई, भित्र्याउन पाए
बिटा थन्क्याएर मोहर, छरौंजस्तै लाग्छ

हिसाबकिताब नआउनेलाई, छोडि आएँ उतै
पराईका टाठी बाठी, हरौंजस्तै लाग्छ

पद पैसा मागे जति, दिन सक्छौ भने
नर्क भन्दा पनि तल, झरौंजस्तै लाग्छ ।

०००
चितवन