नेपाली हास्यव्यङ्ग्य अनलाइन पत्रिका

एम् .पी. कियरलेस :

नभनी नहुने भए भन्थेँ म पनि
लायकको कुरा भए सम्झन्थेँ म पनि

हजुर बाहेक अरु सब उस्तै छन्
भन्नुस् कसरी राम्रो रहन्थेँ म पनि

हामी ठिक समयमा छुट्टिएछौँ
नत्र तिमी जस्तै जस्तै बन्थेँ म पनि

आउँदिन भनेर ठिकै गर्याे उस्ले
नत्र बाटो हेर्थें दिन गन्थेँ म पनि

मसँग निहुँ खोज्न हजुर आउनुभो
कोही अर्को भए सहन्थेँ म पनि

तिमी पनि झन चिसो भैदियौ
थोरै तातो पाए पग्लन्थेँ म पनि

त्यो बर्वादीमा उस्को दिमाग देखिन्छ
गल्ती भएको भए बिर्सन्थेँ म पनि

आजभोलि मनै लाग्न छोड्यो
खेल्थेँ, हिँड्थेँ , दौडन्थेँ म पनि ।

०००
लम्कीचुहा, कैलाली