नेपाली हास्यव्यङ्ग्य अनलाइन पत्रिका

एम.पी. कियरलेस :

यहाँ कहिले को कस्को भयो
यात्रीको कोही आफ्नो भयो ?

तिमीले थाहा पाएको साँचो हो
के गर्नु अलिकति ढिलो भयो ।

मैले जल्नै बिर्सिसकेको रैछु
ऊ आँखै अगाडि आगो भयो ।

तिमीलाई सम्झिँदा अरु केही भएन ?
आँखा चिसा मन तातो भयो ।

ऊ आज यसरी पछुताउनु पर्थेन
हिजो चाहिने भन्दा बढी बाठो भयो ।

अब त उस्ले पनि बिर्सिसक्यो होला
मलाई पनि बिर्सिन सजिलो भयो ।

कस्ले हो यसरी सिमा नाघेको ?
अहिले आएर फेरि युयुत्सुको भयो ।

एक त खानामा नुन बढी थियो
त्यही माथि वचन पनि पिरो भयो ।

उस्ले आउँदैन सोचेर निम्तो पठाएको छ
जाउँ कि नजाउँ अलि गाह्राे भयो ।

जे पनि हुन सक्थ्यो अलि अरु बसे
हाम्रो भेट मिठो भयो तर छोटो भयो ।

हजुरसँगैै मागेर हजुरकै बुझाउँ कि ?
हिजोको तिरियो आजको उधारो भयो ।

फेरि आज पनि एम पी, अतलमा
बहुत कमजोर देखियो सानो भयो ।

०००
२०८०/१२/०४
लम्कीचुहा, कैलाली