दाबी गर्छ
पाप पनि कसैको त पुण्य हुन्छ कि हँ ? साक्षी राख्न बनाएको चार-धाम दाबी गर्छ ॥
डिल्लीप्रसाद अधिकारी :
रावण पनि अचेल आफू राम भनी दाबी गर्छ
तारा पनि अचेल अहो घाम भनी दाबी गर्छ ॥
उसले लुट्यो आफ्ना पोस्यो कमजोरीलाई मार्यो।
पसिनाले कमाएको दाम भनी दाबी गर्छ ॥
धनीहरू अझै धनी गरीब माग्ने बनिसके
ठूला ठूला ठूला गरेँ काम भनी दाबी गर्छ ॥
पढेका छन् बेरोजगार चारणहरू धनी
गरिखाने बनाएँ यो ठाम भनी दाबी गर्छ ॥
ऋणैमाथि उँभिएका घर अनि कुद्ने गाडी
देखाएर बनाएँ यो गाम भनी दाबी गर्छ ॥
पाप पनि कसैको त पुण्य हुन्छ कि हँ ?
साक्षी राख्न बनाएको चार-धाम दाबी गर्छ ॥
डिल्लीप्रसाद सधैँभरि सत्य बोल्दै बाँच्छ
सर्वोच्च नै दिएको छु दाम भनी दाबी गर्छ ॥
०००
सिक्किम