नेपाली हास्यव्यङ्ग्य अनलाइन पत्रिका

बालकृष्ण खनाल :

बेचेर राष्ट्रलाई खाने विचारमा छन् ।
भागेर भ्रष्ट सारा जाने हतारमा छन् ॥

भन्थे चुनावमा जो यो गाउँ स्वर्ग बन्छ ।
छोडेर गाउँ बस्ती नेता बजारमा छन् ॥

जोडेर हात गोडा विस्तारवाद सामू ।
मानेर देव जस्तो दासी गुहारमा छन् ॥

नेता उडेर हेर्लान् आफू जहाजबाट ।
खोलो बढेर आयो बस्ती किनारमा छन् ॥

के धाक सम्पत्तिको गर्छौ धनीहरूले ।
आफ्नो हुँदैन केही ज्यानै करारमा छन् ॥

०००
कैलाली