नेपाली हास्यव्यङ्ग्य अनलाइन पत्रिका

चिरञ्जीवी दाहाल :

बज्न छोड्यो घण्टी अचेल रालो हराएर हो कि
गाउँ पस्ने भन्छन् नाकको कालो हराएर हो कि

दुनियाको मुख थुन्न कोही स्वयं झोले बन्छन्
किन स्विकारोक्ति आयो सालो हराएर हो कि

कोही लर्बरिँदा भन्छन् हामी जान्छौँ फेरि वन
रानीवनमा तिनका सुनको बालो हराएर हो कि

गन्हाउनेलाई बाघेझापु दिने सिंह छैनन् अचेल
चड्कन सुनिदैन कतै गालो हराएर हो कि

कोही चिहान खोतलेर प्राण भर्ने कुरा गर्छन्
नाङ्गो भए सबै किन टालो हराएर हो कि

कोही भने झर्छ अनि खाउँला भन्दै पछि लाग्थे
किन चुप्प होलान् काँधको डालो हराएर हो कि

आन्दोलन, भ्रष्टाचार र बेथितिमै जीवन बित्यो
यो शताब्दी उन्नतिको पालो हराएर हो कि !

०००
चितवन