मरुभूमि नारायणअब हेर्नुपर्छ
ठूलै सपना देखाई मान्छे पुग्छ सत्तामा मान्छे या बाँदर के लगार्छ अब हेर्नुपर्छ । पींधबाट आगो लाउने छिमेकी धेरै छन् आँगनमा कसले बार बार्छ अब हेर्नुपर्छ ।
मरुभूमि नारायण :
कसले जित्छ कसले हार्छ अब हेर्नुपर्छ
कसले हातमा पासो पार्छ अब हेर्नुपर्छ ।
कतिले पैसा बाँडे कतिले भाषण बाँडे
हेरौं कुनले टाउको बजार्छ अब हेर्नुपर्छ।
हिजोसम्म जनताकै अगि पाउमा पर्यो
भोलि मुन्टो कसरी बटार्छ अब हेर्नुपर्छ ।
सबै समस्याको सामना गर्छु भनेको छ
भोलि उसले गर्छ कि टार्छ अब हेर्नुपर्छ ।
सबैले आश गरे विदेशीका दलालबाट
भोलि बनाउँछ कि बिगार्छ अब हेर्नुपर्छ ।
बोल्न जस्तो सजिलो गर्न कहाँ छ तनि
आफैं मर्छ या अरुनै मार्छ अब हेर्नुपर्छ ।
ठूला ठूला कुरा छन् ती जून तारा झार्ने
पात झार्छ कि फल झार्छ अब हेर्नुपर्छ ।
ठूलै सपना देखाई मान्छे पुग्छ सत्तामा
मान्छे या बाँदर के लगार्छ अब हेर्नुपर्छ ।
पींधबाट आगो लाउने छिमेकी धेरै छन्
आँगनमा कसले बार बार्छ अब हेर्नुपर्छ ।
०००
तनहुँ
Subscribe
Login
0 Comments
Oldest
