नेपाली हास्यव्यङ्ग्य अनलाइन पत्रिका

१.
चुनावको बेला नेता घरघर धाउँछन्
कोरा भाषणका पाल्से गीत गाउँछन्
जनताको मत अपहरण गरेपछि भने
सुनको सिंहासनमा मस्त निदाउँछन् ।

२.
देशको राजनीति कीव वा कोलम्बो यात्रामा छ
चुनावी तालमेल गठजोडको गाईजात्रामा छ
अनि कसरी लम्कन्छ देश प्रगतिको मार्गतिर
जहाँ दूरगामी सोच सत्ताले ओडेको कात्रामा छ ।

३.
पशु थियो या मानिस मर्न त अवश्य मर्यो
शोकको अविश्रान्त आँसु हत्केलामै पर्यो
न्यायालय भित्र इमान बन्दी भएको बेला
सभ्यताको कुरुक्षेत्रमा पापीले जँघार तर्यो ।

४.
यूक्रेन हुर्हुर्ती जलिरहेको छ
क्रुर अहंकार बलिरहेको छ
कारण जेसुकै भएपनि
मानवता भने ढलिरहेको छ ।

५.
मानिसले मात्र किन पशुले पनि बाँच्नुपर्छ
सबैको साझा पृथ्वीमा मिलेर नै नाँच्नुपर्छ
प्रकृतिमाथि नाङ्गो हस्तक्षेप तत्काल रोकेर
पछिल्ला सन्ततिको लागि पनि साँच्नुपर्छ ।

झापा