नेपाली हास्यव्यङ्ग्य अनलाइन पत्रिका

१.
बगरमा फुल्नेहरू सबै सबै काँस हुन सक्दैन
ठूलो अण्डा पार्दैमा कुखुरा हाँस हुन सक्दैन
के पो हुन्छ र, आफ्नो भाउ चुरीफुरी देखाएर ?
जति नै बढे पनि निँगालोले बाँस हुन सक्दैन ।

२.
विसङ्गत वर्तमानले रेटिएको के कुरा गर्नु हो
कमजोर निर्बलमा समेटिएको के कुरा गर्नु हो
म जवाफ दिनेवाला छैन, हालखबर सोधेपनि
आफूबाट स्वयं म लखेटिएको के कुरा गर्नु हो।

३.
भुटुन हराएछ साथै ज्वानो हराएछ
पाथी हराए सँगसँगै मानो हराएछ
आधुनिकताको दौड खुब चलिरहँदा
ठेकी मदानी फिर्के ओदानो हराएछ ।

४.
बाढी पसेछ कठै! बेंसी टारी हराएछ
प्लटिङ भएछ र पाखो बारी हराएछ
कच्चा सोचको भीड अत्याधिक हुँदा
पुङ, घ्याम्पो, काठको आरी हराएछ ।

काठमाडौं