नेपाली हास्यव्यङ्ग्य अनलाइन पत्रिका

१.
ख्याक ख्याक खुकखुक र सिँ सिँ चलेकै छ
फोकटको इन्धन प्याँ प्याँ र पिँ पिँ चलेकै छ
ऐले गला मिल्नेले चिन्ने छैन जितेर गएपछि
तर पनि मामाको घोडी मेरी हिँ हिँ चलेकै छ ।

२.
फ्याउराहरू वस्तीमा पस्ने बेला हो यो
बिना बादल असिना खस्ने बेला हो यो
चिल्लो दल्दैमा मख्ख पर्नु हुदैन हजुर
पिठमा डस्नेले चिल्लो घस्ने बेला हो यो ।

३.
नभिडी हुन्न समस्यासङ्ग रोएर हुनेवाला केही छैन
दाग लागेपछि चरित्रमा धोएर हुनेवाला केही छैन
बेदाग रहोस् भीर पहरामा फुलेको फूल जस्तैहोस्
अनुभूतिको स्पर्श रहोस् छोएर हुनेवाला केही छैन ।

४.
पेट काटेर बुझाएको राजस्व शासक वर्गको घोत नहोस्
भनेको छु त्यो सिंहदरबार शिखण्डीहरूको ओत नहोस्
घाँटीमै पक्रिन्छ भन्छन् बिरालोले कोठा थुनेर चुट्यो भने
सत्ताको दाउपेचमा यो जिमी भण्डारखाल या कोत नहोस् ।

०००
गुल्मी