केही ठोक्तक
प्रगतिको बाधक नारी नै बन्छे राम्रा त थोरैमात्र देख्छु, समाजकी आदर्श नारी भन्दै कुटिल चाल चलेरै पछार्छन् ।
१.
नारीले नारीकै खेदो र भेद गर्छन् उठ्नै नदिई थचार्छन्
गिराउछन् मनोबल उसको सधै अस्मिता नै लछार्छन्
प्रगतिको बाधक नारी नै बन्छे राम्रा त थोरैमात्र देख्छु
समाजकी आदर्श नारी भन्दै कुटिल चाल चलेरै पछार्छन् ।
२.
साधारण नारी म यही धर्तीकी, कुनै घमन्ड जान्दिनँ
विवेकले राम्रो देखेको गर्छु काम नराम्रो गर्न मान्दिनँ
पृथिवी जस्तै सहन सक्छु हरेक बाधा-व्यवधानहरू हेर
होच्याऊ घोच्याऊ खसाल जे गर कसै ठुलो ठान्दिनँ ।
३.
मिहिनेतको पसिनामा गर्व गर्छु म कसैको दयामा होइन
मलाई पूणर् भरोसा छ मेरै श्रममा कसैको मायामा होइन
उभिएर आफ्नै बलमा डटेकै छु एक्लै सङ्घर्षको मैदानमा
म मेरो प्रतिबिम्ब खोज्दै छु रापिलो सूर्यमा, छायामा होइन ।
०००
राजाको चौतारो, पोखरा