नेपाली हास्यव्यङ्ग्य अनलाइन पत्रिका

घनश्याम रेग्मी :

१)
सबै पार्टी भए उस्तै गाह्रो धोती समाउन
पार्टी सिद्धान्त बेचेर लागे चोती जमाउन
हाम्रो नेतृत्वको चाला लाजमर्दो म देख्दछु
दलेर मुखमा कालो लागे लोती कमाउन ।

२)
भन्सारबाट भित्रिँदा हरेक वस्तु लसुन बन्छ
जहाज चढेर जुम्ला हुम्लातिर पुग्दा नुन बन्छ
भारतबाट मोटरसाइकल हङकङबाट ब्रेक सु
भरियाले आयात गर्छ र पक्राउ पछि सुन बन्छ ।

३)
ल्याउने अर्कै कोही छ पक्राउ पर्छ आन्दोलन हुन्छ
छुटाउने, फुटाउने र जुटाउने गर्छ आन्दोलन हुन्छ
केही गर्ने गरेको बानी खाली बस्न मन लाग्दै लाग्दैन
आफू देशभक्त देखाउन भ्रम छर्छ आन्दोलन हुन्छ ।

४)
सयौंचोटि ओहोरदोहोर किन रहेछ थाहा भयो
गरूँ कि ओहोरदोहोर म पनि यस्तै चाहा भयो
कत्रो सेटिङ मिलाएर केही खेप के झरेको थियो
कसका आँखा फुटे कमायो खायो रे डाहा भयो ।

०००
भरतपुर ५, चितवन