नेपाली हास्यव्यङ्ग्य अनलाइन पत्रिका

रुद्र ज्ञवाली :

१.
जिन्दगीका अध्यायहरूमा अनेकौँ सवाल भेटिन्छ
पाइलापाइला गौँडागौँडामा थापेको धराप भेटिन्छ
यस्तै रहेछ मान्छे भन्नू भित्र एकथोक र बाहिर अर्कै
प्रत्येक मान्छेको मुहारमा मुखुण्डो र नकाव भेटिन्छ ।

२.
नाटक गर्छन् तामझाम बिचित्रका झाईं गर्छन्
कोही तपाईं भनोस् नभनोस् आफै मपाईं गर्छन्
सारमा उस्तै हुने गर्छन् पर्खालभित्रबाट भुक्नेहरू
भित्र छँदा चर्को भौँ भौँ बाहिर जाँदा काईं गर्छन् ।

३.
चल्न त जिन्दगीहरू जसरी तसरी चलिरहेका हुन्छन्
बाँच्नुको नाममा मृत्युका केही पल छलिरहेका हुन्छन्
दण्ड अथवा पुरस्कार जे दिनु पर्छ त्यो दिन्छ समयले
अरूलाई जलाउन खोज्नेहरू आफै जलिरहेका हुन्छन् ।

४.
कोर्रा हानेर नुन दल्ने हो भने साविती हुन सक्थे
लुटेरा र तस्कर कसरी जनताका साथी हुन सक्थे
यी त कंशहरू हुन् सुधिन सक्छन् विश्वास नगर्नुस्
रत्नाकर भए बरू सुधारिएर वाल्मिकी हुन सक्थे ।

०००