नेपाली हास्यव्यङ्ग्य अनलाइन पत्रिका

अमर सन्तति :

१.

को शत्रु यहाँ को हो बन्धु मित्र
संसार छ यो अति नै विचित्र
छ सारा ध्यान स्वार्थमै खिपेको ,
बुझ्नै नसक्ने छ मनुवा चरित्र ।

२.

अलिकति बुद्धि विवेक चढिदिए हुन्थ्यो
असल कुरा मनभित्र गढिदिए हुन्थ्यो
केही सुधार हुन्थ्यो कि त देश हेर्ने दृष्टि !
शासकले सिर्जना केही पढिदिए हुन्थ्यो ।

३.

पराइ चलखेलको सारा नालीबेली खोल्नु भो
सत्ताको लागि हेर्नुस् त अनेक दु:ख मोल्नु भो
केटाकेटीपन अझै कहाँ हराएको छ र उहाँमा !
नबोल्नु है भनेको त रिठ्ठो नबिराई सत्य बोल्नु भो ।

४.

के के गर्छु भन्छ मान्छे समयलाई छोप्न सक्दैन किन ?
आफूभित्रको कालो कल्मषलाई पोख्न सक्दैन किन ?
आफ्नै जाति मान्छेलाई जित्दा जितेको ठान्छ संसारनै ,
मैँ हूँ भन्ने मान्छेले आफ्नै मृत्युलाई रोक्न सक्दैन किन ?

०००

भक्तपुर ।