रुद्र ज्ञवालीतीन ठोक्तक
खेती सपार्ने एउटा र बाली भित्र्याउने अर्कै हुन्छ श्रमिक जिल्लाराम पर्छ तक्मा लाउने अर्कै हुन्छ परिणाम निकाल्छ एउटाले ढेँडुहरू फेटा गुथ्छन् पसिना बगाउँछ एउटा र पदक पाउने अर्कै हुन्छ ।
रुद्र ज्ञवाली :
१.
मही र घ्यु छुट्ट्याउँछ मदानीले हो कि होइन
उठाउँछ गिराउँछ आफ्नै बानीले हो कि होइन
कमजोर ठान्दै नठान्नु तिमी आँसु या पानीलाई
पहरो काटेर बाटो बनाउँछ पानीले हो कि होइन !
२.
जति सताउँछस् सता सहनेमा सहने तत्व बढ्छ
जति धुर्त्याईँ गर्छस् त्यत्ति मुठभेड र द्वन्द्व बढ्छ
असुल्न जान्ने दिन नजान्ने सर्कारलाई सुझाव मेरो
लाशमा पनि कर लगाए त मज्जाले राजस्व बढ्छ ।
३.
खेती सपार्ने एउटा र बाली भित्र्याउने अर्कै हुन्छ
श्रमिक जिल्लाराम पर्छ तक्मा लाउने अर्कै हुन्छ
परिणाम निकाल्छ एउटाले ढेँडुहरू फेटा गुथ्छन्
पसिना बगाउँछ एउटा र पदक पाउने अर्कै हुन्छ ।
०००
भैरहवा ।
