किरण अन्जानपाँच ठोक्तक
कौवाझै टौवामाथि बसेर भाषण दिनेहरू हो राहतको नाउँमा सडेका गलेका रासन दिनेहरू हो ए बुढा साँढेहरू कुन पाराले कृषि क्रान्ति गर्छु भन्छौ एकमुठी मल पुर्याउन पनि पचासौँ आश्वासन दिनेहरू हो ।
किरण रिजाल ‘अन्जान’ :
१.
इमानदार श्रमजीवीलाई कालोमोसो दले पनि हुन्छ
सभ्यता र संस्कृतिलाई बुटको मुनि मले पनि हुन्छ
सोझासाझा जनतालाई अब बाँच्न कति गाह्रो भयो
गरि खान्छु भन्नेको हातखुट्टामा तरबार चले पनि हुन्छ ।
२.
धर्म कर्म संस्कृतिलाई रेटे पनि हुन्छ
खुट्टा भन्दा बरु टाउकाले टेके पनि हुन्छ
जस्तोसुकै गर्न पनि भ्याएकै छौ सरकार
गोरुलाई ठूलो खासी भन्दै कानुन लेखे पनि हुन्छ ।
३.
पञ्चामृत पनि भने जस्तो कहाँ शुद्ध पाइन्छ
जहाँ सिनो भेटिन्छ त्यहीँ पो गिद्घ पाइन्छ
स्वार्थको माथि स्वार्थ खप्टिएको यो जमानामा
जतिसुकै आराधना गरेपनि कहाँ बुद्घ पाइन्छ ।
४.
कौवाझै टौवामाथि बसेर भाषण दिनेहरू हो
राहतको नाउँमा सडेका गलेका रासन दिनेहरू हो
ए बुढा साँढेहरू कुन पाराले कृषि क्रान्ति गर्छु भन्छौ
एकमुठी मल पुर्याउन पनि पचासौँ आश्वासन दिनेहरू हो ।
५.
आफ्नो मात्र मनोमानी गर्नेको बुद्धि फिर्ला कैले
आफ्नै खेतमा आफैँ बीस छर्नेको बुद्धि फिर्ला कैले
आफू आफैमा आह्रिस गर्दै देशलाई भड्खालोमा पार्ने
विदेशीको थुक चाटी पेट भर्नेको बुद्धि फिर्ला कैले ।
०००
विराटनगर
Subscribe
Login
0 Comments
Oldest
