नेपाली हास्यव्यङ्ग्य अनलाइन पत्रिका

रुद्र ज्ञवाली :

१.
साउती गर्दै सुटुक्क कान शकुनीका भर्दैनस् भने
झुकेर पाउमा कँसको यदि लम्पसार पर्दैनस् भने
घटाइन सक्छ बिचार गर्नू हत्केलाका जीवनरेखा
बसेर माफियाको घेरामा उनकै स्तुति गर्दैनस् भने ।

२.
बलिको साम्राज्य लुट्न विष्णुको पाइला बनेर पस्छन्
कहिले लिटिल ब्वाइ कहिले फ्याट म्यान बनेर खस्छन्
आँट छ भने मानावाधिकारको कोचिङ त्यतै पढाउनुस्
मानवताका वैरि टेनडाउन स्ट्रीट र ह्वाइटहाउसमा बस्छन् ।

३.
सम्भावना हेरेर मान्छेहरूका फेरिँदा रहेछन् मिजासहरू
स्वतन्त्र बाँचेको देख्नै सक्दैनन् कुनै मालिकले दासहरू
रङ्गमन्चमा अभिनय एकथोक पर्दाभित्र सत्य अर्कै हुन्छ
भिडाई रहेछन् मालिक भिड्दैछन् इजरायल हमासहरू ।

०००
भैरहवा ।