नेपाली हास्यव्यङ्ग्य अनलाइन पत्रिका

अमर सन्तति :

१.
विकृतिका माडहरू होसियार
स्वार्थका गलगाँडहरू होसियार
अब बस्ने छैनौँ चुपचाप हामी,
यो देशका भाँडहरू होसियार ।

२.
खाली पाना पठाएर अब पढ भन्छौ
भर्‍याङ नै हटाएर अब चढ भन्छौ
कति राम्रो बानी तिम्रो अनुकरणीय !
खुट्टा तानी लडाएर अब बढ भन्छौ ।

३.
जान्नु तान्नु केही छैन, आइ लाग्यो घाँडो
सफा गर्ने कोही छैन काइ लाग्यो भाँडो
अब झनै बिग्र्यो चाल, के होला र राम्रो !
सावधान ! लाटो देशमा जाइ लाग्यो गाँडो ।

४.
जति तान्नुस् बल गरी, हाल्नुस् ढुङ्ग्रोभित्र
कुकुरको पुच्छर कहाँ सोझिन्छ र मित्र ?
कस्तो भयो मान्छेको जात ! मान्छे देख्छ शत्रु,
कोपरे झैँ बाँदरले देख्दा आफ्नै रुपको चित्र ।

०००
भक्तपुर ।