नेपाली हास्यव्यङ्ग्य अनलाइन पत्रिका

रुद्र ज्ञवाली :

१.
कोट्टयाउने कमी कमजोरी मात्रै गन्ने पनि हुँदा रहेछन्
चकचक धेरै गरेपछि मालेसाधु बन्ने पनि हुँदा रहेछन्
हेर्नुस् न वर्तमानको चालचलन र समयको चर्तिकला
काँडा बिछ्याई बाटोमा आएन भन्ने पनि हुँदा रहेछन् ।

२.
तासको पत्ताझैँ फेटिने यो सहरको के कुरा गर्नु र खै
यात्राका पदचिह्न मेटिने यो सहरको के कुरा गर्नु र खै
तौलिँदा रहेछन् मनहरू जहाँ मात्र औकातको तुलोमा
कमजोरको घाँटी रेटिने यो सहरको के कुरा गर्नु र खै ।

३.
निर्धन निमुखो आफन्तसङ्ग आफन्तले मुख मोडेजस्तो
व्यापार बिग्रेको साझेदारसङ्ग सर्त सम्झौता तोडेजस्तो
सुखमा जो हितैषी बन्छन् दुखको बेला नचिनेझैँ गर्छन्
फलेका फल सिद्धिएपछि चराले पनि रूख छोडेजस्तो ।

०००
भैरहवा