नेपाली हास्यव्यङ्ग्य अनलाइन पत्रिका

रुद्र ज्ञवाली :

१.
यस्तै हो मन नपरेपछि सोझो पनि टेडो देखिन्छ
मनै बाउँठिएको बेला मैदान पनि छेडो देखिन्छ
कैफियत दृष्टिको नभएर हुन सक्छ दृष्टिकोणको
हेर्ने नजरिया बदलिएपछि मृग पनि भेडो देखिन्छ ।

२.
मुख मिठ्याई र्‍याल चुहाउँदैछन् दूधचोर म्याउँहरू
दुःख दुखेसो पोख्दैछन् अनाथ ती क्याउँक्याउँहरू
खसेको आकाश उठाउँ भन्छ म्याद गुज्रेको हाब्रेले
उत्तानो परेर खुट्टा ताक्दैछन् बिचरा हुटिट्याउँहरू ।

३.
श्रमको मूल्य छँदै छैन बरू मगन्तेको झोली चल्छ
छ या छन् भने शक्तिमा उसले बोलेकोे बोली चल्छ
ननिस्कनु बाहिर नानीहरू र लुकामारी पनि लखेल्नू
डराउँछ सरकार र डरको भूत मन्साउन गोली चल्छ ।

४.
दन्केको आगोमा मट्टितेल हाल्नेहरू महान् हुन्छन्
जता ताल बज्छ त्यतै खुट्टा चाल्नेहरू महान् हुन्छन्
के हुन्छ के हुन्न भन्नै छ गाह्रो धुन्धकारीको शाशनमा
पाल्नेहरू नै पेलिन्छन् जहाँ ढाल्नेहरू महान् हुन्छन् ।

०००
सिर्जनानगर, भैरहवा