नेपाली हास्यव्यङ्ग्य अनलाइन पत्रिका

अमर सन्तति :

१.
यो दुनियाँ स्वार्थी र पापी छलीकै रहेछ
विश्वासघाती लोभी बाहुवलीकै रहेछ
भन्थे नि पूर्वजले त होश गरे है हे बाबु !
साँच्चै यो समय त घोर कलीकै रहेछ ।

२.
सप्रिने कि थच्चिने हो ! आफैँ विचार गर
हच्किने कि मच्चिने हो ! आफैँ विचार गर
जनता अब सोझा छैनन्, झुक्याउन गाह्रै पर्ला
सक्किने कि सच्चिने हो ! आफैँ विचार गर ।

३.
कहिले गोरा आउँछन् त कहिले कालाहरू
कहिले भतिजा आउँछन् त कहिले सालाहरू
भान्छामा उक्लिएर स्वाद फेर्नलाई ए हजुर,
कहिले बाँदर आउँछन् त कहिले बिरालाहरू ।

०००
रामेछाप, हाल भक्तपुर