नेपाली हास्यव्यङ्ग्य अनलाइन पत्रिका

अमर सन्तति :

१.
उहाँ मेरो विषयमा त भलिभाँती जान्नुहुन्छ
मेरो अघि ठिक्क पारी पछि लात्ती हान्नुहुन्छ
किनकि उहाँ मेरो असल मित्र हो नि हजुर,
त्यसैले त खुट्टा समाई आँत्तीआँत्ती तान्नुहुन्छ ।

२.
पराइलाई गर्न तिमी सर्छौ अघि नमस्कार
यो देश र जनतालाई गर्छौ सधैँ तिरस्कार
कहिले बेची नदीनाला, कहिले असमान सन्धि ,
सौदाबाजी गरी गरी धर्छौ कुर्सी पुरस्कार ।

३.
मेरो सत्ता तेल र नुनसँग मितेरी लगाउँछ
नक्कली शरणार्थी र सुनसँग मितेरी लगाउँछ
अप्राकृतिक अनमेल गठजोडमा रमाउँदै,
एनसेल र ढुकुटीको घुनसँग मितेरी लगाउँछ ।

०००
रामेछाप, हाल भक्तपुर