नेपाली हास्यव्यङ्ग्य अनलाइन पत्रिका

अमर सन्तति :

१.
सत्ता उन्माद र तृष्णा बेल्ने ठाउँ भएको छ
एक आपसमा बेस्सरी पेल्ने ठाउँ भएको छ
थाँती राखी आज देश र जनताको मुद्धा,
संसद छाडा जुहारी खेल्ने ठाउँ भएको छ ।

२.
भित्र अर्कै बाहिर भने ढोँग पाल्नेहरूसँग
जुनैबेला लोभ स्वार्थको भोग पाल्नेहरूसँग
आफ्नै खुट्टामा हानेजस्तो हुने रैछ बन्चरोले,
नगर्नु पो रैछ सङ्गत यी रोग पाल्नेहरूसँग ।

३.
आफू दौडिने बलियो गोडा बनायौ
टापयुक्त वेगवान घोडा बनायौ
बनेर आफू हली एक नम्बरको छट्टु,
जनतालाई हल गोरु जोडा बनायौ ।

०००
रामेछाप, हाल भक्तपुर