दिव्य गिरीचार ठोक्तक
किचे पनि थिचे पनि मर्छु, म हजुर कै शरणमा छु धर्म सङ्कटमा छु, भन्न सक्दिन कि म मरणमा छु तपाइँको शासन किन यति विघ्न अराजक हजुर ? आफ्नै पुर्खाको देशमा सधैँ म अपहरणमा छु ।
दिव्य गिरी :
१.
हामीले भोट दिएको तिनकै मात्र भुँडी भर्न हो र ?
हामीले भोट दिएको आफैँ अन्यायमा पर्न हो र ?
हामीले अधिकार प्रयोग गर्यौँ, तिनले कर्तव्य बिर्सिए
हामीले भोट दिएको तिनलाई भ्रष्टाचार गर्न हो र ?
२.
रूप अनेक अनेक तपाइँको बोली अनेक अनेक
झुटलाई सत्य हो भन्ने तपाइँको लोली अनेक अनेक
गुटबन्दी, फुटबन्दी र लुटबन्दीको नाइके तपाइँ
साथ लिई हिँड्नुहुन्छ गुन्डा टोली अनेक अनेक ।
३.
गाउँबाट लगाएर आ’को चप्पल शहरमै छोड्नु भएछ
गाउँलेलाई दिएको वचन शहर नपुग्दै तोड्नु भएछ
बेइमान बन्नुभयो, राजनीतिको पगरी गुँथेपछि
बिर्सेर कर्तव्य छलकपटको गमला गोड्नु भएछ ।
४.
किचे पनि थिचे पनि मर्छु, म हजुर कै शरणमा छु
धर्म सङ्कटमा छु, भन्न सक्दिन कि म मरणमा छु
तपाइँको शासन किन यति विघ्न अराजक हजुर ?
आफ्नै पुर्खाको देशमा सधैँ म अपहरणमा छु ।
०००
महालक्ष्मी न.पा.५
टीकाथली, ललितपुर ।
Subscribe
Login
0 Comments
Oldest
