नेपाली हास्यव्यङ्ग्य अनलाइन पत्रिका

रूद्र ज्ञवाली :

१.
मनमौजी छन् मन लागेको आफूखुसी गर्छन्
कपटीहरू कानेखुशी साउती जासुसी गर्छन्
आफ्नै लयमा बाँचिरहन्छन् स्वाभिमानीहरू
मनमा दासता बाँचेकाहरूले चाप्लुसी गर्छन् ।

२.
जानाजान ढुङ्गामा खुट्टा ठोस्न कहाँ सकिन्छ र
बलजफ्ती कसैको मन खोस्न कहाँ सकिन्छ र
मनभित्र आगो हुनेहरूले डढेलो लगाए भन्दैमा
मनको आवादीमा आगो झोस्न कहाँ सकिन्छ र ।

३.
कोही शोक कोही उत्सव मनाइरहन्छ्न् घरीघरी
कसैले दीप कसैले दील जलाइरहन्छ्न् घरीघरी
प्रदर्शनीमा राख्न र विज्ञापन गर्न नमिलेर मात्रै हो
यादका जन्ती र मलामीहरू आइरहन्छन् घरीघरी ।

४.
एउटा मिचिएको मिचियै अर्को मिचेको मिच्यै कसरी चल्छ ?
एउटा किचिएको किचियै अर्को किचेको किच्यै कसरी चल्छ ?
एकले अर्काको संवेदना बुझ्नु पर्ने हो मजबुत सम्बन्धका लागि
एउटा थिचिएको थिचियै र अर्कोले थिचेको थिच्यै कसरी चल्छ ?

०००
रूपन्देही