नेपाली हास्यव्यङ्ग्य अनलाइन पत्रिका

रूद्र ज्ञवाली :

१.
मलामी जाँदा पनि रङ्गिएको छाला चलेकै छ
हुँदा न खाँदाको तामझाम र झाला चलेकै छ
कसैले तपाईं भनोस् या नभनोस् मपाईँ आफै
आफै आयोजक र आफैलाई माला चलेकै छ ।

२.
कुकुरले कुकुर र बिरालाले बिरालो साथी खोज्छन्
चोरले चोरकै साधुले साधुकै कुरामा ताली ठोक्छन्
धोका पाउँछन् इमान्दारहरूले साक्षी यो इतिहास छ
किनकि सज्जनहरूले सबैलाई आफू जस्तै सोच्छन् ।

३.
परिवेश कहिले खुकुरी हुन्छ त कहिले तरबार हुन्छ
जीवन कहिले खुद्रा पसल कहिले थोकबजार हुन्छ
आउन् जे जस्ता प्रतिकूलता तर हरेश नखानु ए मन
थाकेको ज्यान भन्दा थाकेको मन बढी लाचार हुन्छ ।

४.
यत्ति नबिर्सनुस् मुर्दा शवको मात्रै दायित्व सकिन्छ
हक छोडेपछि सम्पत्ति माथिको स्वामित्व सकिन्छ
ठुलो ठाउँमा पहूँच छ भनेर धेरै घमण्ड नगर्नुस् भो
सागरमा मिलेपछि नदी स्वयंको अस्तित्व सकिन्छ ।

०००
भैरहवा