नेपाली हास्यव्यङ्ग्य अनलाइन पत्रिका

इ. कुमार खड्का

१.
जगमा मात्र हैन भित्तामा पनि भ्रष्टाचार
कित्तामा मात्र हैन फित्तामा पनि भ्रष्टाचार
मिटरमा के कुरा ? मिलि, सेन्टि, नछोड्नेको,
चितामा सुत्ने बेला बित्तामा पनि भ्रष्टाचार ।?

२.
गरुडको छाया पर्ने सर्प नागभै पूजित छन्
भिमसेनको वाहावाही युधिष्ठिर विजित छन्
सृष्टिकर्ता गुमनाममा आरोप र प्रत्यारोपले
शिवलिङ्ग काखी च्याप्ने शक्तिपूजा सृजित छन् ।

३.
अपराधीले अँध्यारोमा कपटी पासा चलाउछ
स्वाभिमानी हिम्मतले सम्मुखमै तीर छलाउछ
बाँदर जाति हुनुपर्छ बाघको जुँगा चलाउनेको,
हनुमान हुन सके पो सुनको लङ्का जलाउछ ।?

४.
अन्ध भक्तिमै रमाउछन् शक्तिका पुजारीहरु
हावी हुन्छन् समाजका जारी र विचारीहरु
मोहरा बनाउने पनि शक्तिकै छाया रुपमा,
काँध चढेरै भत्काउछन् आपसी समझदारीहरु ।

५.
जहाँ ईज्जत बिक्रिमा हुन्छ इमान्दारिता रेटिन सक्छ
झुट, बकवासको फन्दामा लक्ष्मण रेखा मेटिन सक्छ
हराउनु हुँदैन विश्वास र गिराउनु हुँदैन आत्मविश्वास,
लिलाम बढाबढ गर्दैमा महानायक नभेटिन सक्छ ।

०००
आलापोट, काठमाण्डौं ।
२०८२/०३/१३