नेपाली हास्यव्यङ्ग्य अनलाइन पत्रिका

कुमार खड्का :

रगतको होली खेल्नेले लाभ हानिको कुरा गर्छ
मानवता हराएपछि आत्मग्लानिको कुरा गर्छ
राष्ट्रका धरोहरभन्दा तिनका पार्टी पसल ठूलो ?
इज्जत, आमोद बिक्रि गर्दै ऊ जवानीको कुरा गर्छ ।१

राम्रो, नराम्रो हेर्दैन आफ्नो,अर्को मात्र हेर्छ ऊ
मुठ्ठी खोल्न पनि गाउँको कि घरको मात्र हेर्छ ऊ
दिमागी रोग लागिसक्यो पक्ष विपक्षको तानाले,
तथ्य र तर्क हेर्दैन, भीडको लर्को मात्र हेर्छ ऊ ।२

मूल्यवान कुरा पनि जलेपछि मूल्यहीन हुन्छन्
फुकुवा हुँदा बन्देजबाट बेकामे स्वाधीन हुन्छन्
उन्मुक्त पसिनाको साँचो प्रतिफलमा केही हुँदा,
लुट,खसोटको थुप्रोमा अश्लीलता, घीन हुन्छन् ।३

हर मरिसकेको छ उस्को मुख अझै मरेको छैन
पहिचान भयो, ऊ चोर हो, पछि अझै परेको छैन
कराउँदैछ ट्यार् ट्यार्, वर्षादको खस्रे भ्यागुतोझैँ,
हीन भैसकेको छ ऊ, कुहेर अझै झरेको छैन ।४

बुद्धिले मात्र हुँदैन मानिसको विवेक हुनुपर्छ
सेवा, श्रम गर्नेलाई उचित निमेक हुनुपर्छ
चढाईको अर्थ छैन,कुठाउँ पलाएका ऐंजेरुको,
पसिनाको इज्जत, इमानको अभिषेक हुनुपर्छ ।५

०००
आलापोट, काठमाण्डौं ।
२०८२/०६/०२-०३