नेपाली हास्यव्यङ्ग्य अनलाइन पत्रिका

रूद्र ज्ञवाली :

१.
आफ्नाले नै आफ्नालाई खेदो खनेको देख्दैछु
कुपात्रले सत्पात्रलाई नै कुपात्र भनेको देख्दैछु
अफ्ठ्यारो पर्दा देश त्यागेर परदेश पस्नेहरू नै
फेसबुकमा भने खाँटी देशभक्त बनेको देख्दैछु ।

२.
गणना नै हुँदैन भने रहेर पनि के नरहेर पनि के
न्याय मरेको बेला सहेर पनि के नसहेर पनि के
संरक्षकहरू नै संविधानको पालना गर्दैनन् भने
कागजको खोस्टो भएर पनि के नभएर पनि के ।

३.
कोही वेफ्वाँंक गफ छाँट्छन र चर्चामा रहन्छन्
कोही कसैको जुठो चाट्छन् र चर्चामा रहन्छन्
परिचय नभएका भने फगत परिचयका मोहमा
परिचितहरूका कुरा काट्छन् र चर्चामा रहन्छन् ।

४.
कुनै रिन यस्ता हुन्छन् कि तिरौँ भने तिर्न मिल्दैन
कुनै खटिरा यस्ता हुन्छन् निचोर्न र चिर्न मिल्दैन
तिमीलाई त सजिलै छ ठुस्केर माइत गैदिए भयो
म पुरुष तिमी जस्तै घुर्‍क्याएर कतै छिर्न मिल्दैन ।

०००
भैरहवा