नेपाली हास्यव्यङ्ग्य अनलाइन पत्रिका

अमर सन्तति :

१.
पाइलापाइलामा यहाँ सतर्कता चाहिँदो रहेछ
जता पनि प्राय उस्तै उस्तै आदत पाइँदो रहेछ
प्राणीमध्येको सबैभन्दा धोकेबाज हो कि मान्छे !
अधिक विश्वासले पनि धोका पो खाइँदो रहेछ ।

२.
कुहिएका ती जरा पो हुन् यी आफैँ गल्नेछन्
सुकिसकेका लहरा पो हुन् यी आफैँ जल्नेछन्
मात्र एकपटक सच्चिऔँ हामी चुनावको दिनैमा,
आडबिनाका बिचरा पो हुन् यी आफैँ ढल्नेछन् ।

३.
सत्ताका रोगी नदेखियून् अब, यही छ कामना
स्वार्थका भोगी नदेखियून् अब, यही छ कामना
जो आए पनि उस्तै हुन् भन्ने भाष्य चरितार्थ गर्दै-
कानफट्टा जोगी नदेखियून् अब, यही छ कामना ।

०००
भक्तपुर