नेपाली हास्यव्यङ्ग्य अनलाइन पत्रिका

स्याङ्जा, ०८० साउन २७ । भेषजराज साहित्य प्रतिष्ठानले आफ्नो नियमित रचना वाचनको ६३ औँ शृङ्खला एक कार्यक्रम गरी शनिबार सम्पन्न गरेको छ ।

कार्यक्रममा डा.अच्युतशरण अर्यालले लेख्नु भएको ‘प्राकृतिक जीवनशैली’ नामक कृतिको पनि चर्चापरिचर्चा गरिएको थियो ।

कार्यक्रमका प्रमुख अतिथि नेपाली लेखक संघ स्याङ्जाका अध्यक्ष मिलन समीरले लेखकको मृत्युपछि पनि उसका कृतिहरूले नै अमर बनाउने भएकाले कृति प्रकाशन गर्नु आवश्यक रहेको कुरामा जोड दिनुभयो ।

कृतिका समीक्षक पूर्णामृत भवानी माविका सहायक प्रधानाध्यापक दीपक लम्सालले कृतिको साङ्गोपाङ्गो चर्चा गर्दै कृति पठनीय एवम् सङ्ग्रहणीय रहेको कुरा व्यक्त गर्नुभयो ।

कृतिकारले कृति आफ्नो लामो अध्ययन र प्रयोगबाट जन्मिएको कानकारी गराउनुभयो ।

कार्यक्रम कृष्णप्रसाद अर्यालको भक्तिमय कविताबाट सुरु भएकोमा विशाल ज्ञवालीले प्राकृतिक जीवनशैलीका बारेमा जानकारी गराएका थिए । यसैगरी स्वास्थ्यकर्मी श्याम अर्यालले आँखा पाक्ने रोगको बारेमा जानकारी गराए ।

उपस्थित महिलाहरूले सामुहिक रूपमा विभिन्न लोक भाका सुनाउनुभयो । यस्तै स्रष्टा कमल बगालेले छिमेकी शीर्षकको लघुकता सुनाउनुभयो । देशबन्धु आचार्य, शिव आर्याल, दमकला बगाले, अमृत रेग्मी लगायतले आआफ्ना रचना वाचन गर्नुभएको थियो । कार्यक्रममा आफ्नो रचना सहित शुभकामना दिनुभएको थियो समाजसेवी केदारशरण विकल र पूर्व जनप्रतिनिधि अनन्तराज शर्मा पंगेनीले ।

कान्छा पंडित बालकुमारी अक्षर पुरस्कार सांस्कृतिक शोधगुठी, वालिङ- ८, भीमटारी, पिरामिड कुटीको संयोजनमा सम्पन्न उक्त कार्यक्रमको अध्यक्षता प्रतिष्ठानका सदस्य लेखनाथ काफ्लेले गर्नुभएको थियो भने सञ्चालन सचिव श्यामप्रसाद ढुङ्गानाले गरेका थिए । कार्यक्रमको अन्त्यमा हरिनाम संकीर्तन पनि गरिएको थियो ।

०००
– श्याम ढुङ्गाना, स्याङ्जा