नेपाली हास्यव्यङ्ग्य अनलाइन पत्रिका

अर्जुन दाहाल (क) :

दशैंको बेला शुभकामनासँगै उपहार दिने हाम्रो पुरानो चलन हो। आशीर्वाद (आशिष) दिनेहरूका आ-आफ्नै शैली र तरिका देखिन्छन्/सुनिन्छन्। यसपालिको दशैंको जानकारी आइपुग्न बाँकी नै छ, तर आजको व्यङ्ग्य लेख भने पोहोर सालको दशैंमा केही चर्चित व्यक्तिहरूले दिएका उपहारहरू वरिपरि घुम्नेछ।

गत वर्षको दशैं टीका लगाएसँगै काँडाकमलले आफ्नी नातिनीलाई उपहारस्वरूप ‘कोच कम्पनी’को हाते ब्याग दिएका थिए, जसको बजार मूल्य करिब ७ लाख रुपैयाँ पर्छ भन्ने अनुमान गरिएको थियो। ज्योतिष देउवाले आफ्ना छोरालाई ‘हिल्टन होटल’ नै दिने योजना बनाएका थिए, तर अन्त्यमा टिकापुरको २५ रोपनी जग्गामा कुरा मिलाएको सुनिएको छ। उता, तरवार ओलीले महिषासुर उठ्नेतलाई टीका लगाएर, “आफ्नै श्रीमतीको शोभा राख्नु” भन्ने आशीर्वाद ,साथमा केही थान लाठी उपहार दिएका थिए। ती लाठीहरू निकट भविष्यमा प्रयोग गर्ने योजना रहेको चर्चा छ।

सादगीको प्रतीक मानिने डा. महानवीर पुनले टीका लगाइसकेपछि “जे सुकै गर” भन्ने आशिष दिएका थिए। तर्क सम्पाङले ढुंगा उपहार दिए भने, धुर्मुस लेखकले रगतले मुछिएको खरानी। सहनशील कार्कीले नेपालको चुच्चे नक्सा उपहार दिएकी थिइन् भने रवि मदानीले सादा कागज।

तपाईं यो लेख पढ्ने कि नपढ्ने भनेर सोचिरहनु भएको छ भने म पनि उही पुरानै चप्पल लगाएर भन्न चाहन्छु— “जे सुकै गर्नुहोस्।”

०००
(व्यङ्ग्य लेखक दाहाल नुन चिनी पानी अमेरिकाका परिकल्पनाकार हुन् )