नेपाली हास्यव्यङ्ग्य अनलाइन पत्रिका

रमेश खकुरेल :

दशैं मान को भन्छ भैगो नमान
कहाँ भन्छ को धूमका साथ मान
छ इच्छा भने शानले मासु खाऊ
नसक्ने नखोज्ने भए भो नखाऊ ।।

दुई अक्षता फूलको एक थुङ्गा
छ पानी कचौरा त्यही हुन्छ गङ्गा
र नैवेद्यमा वेदना जो चढाऊ
मुमा सुन्दछिन् जे भन्यौ भक्ति भाउ ।।

जहाँ कर्म गर्छौ त्यही अर्चना हो
जहाँ नम्र बन्छौ त्यही बन्दना हो
घरैमा मुमा वा सुता भै रहन्छिन्
कि देवी स्वयंकी प्रियारूप बस्छिन् ।।

तिमीभित्र जो क्रोध वा लोभ हुन्छ
त्यही चण्ड वा मुण्डको रूप हुन्छ
खुशी राख देवी सबै हट्न जान्छन्
नयाँ शक्ति ऊर्जा त्यहाँ जुट्न थाल्छन् ।।

कहाँ लाग्छ मुश्कानका लागि पैसा
कहाँ खोज्छ तिम्रो मिठो शव्द पैसा
श्रमी हातका लागि के दूर पैसा
गरे लोभ धेरै भयो झूर पैसा ।।

दशैं नौरता मात्र मानेर हुन्न
खुशी एक घण्टा मनाएर हुन्न
बिना सिर्जनाले पुकारेर हुन्न
व्यथा आह पोखी लघारेर हुन्न ।।

जता हेर तिम्रो दशैं नै दशैं छ
हँसाएर हाँस्नू खुशी यत्तिकै छ
सधैं दिन्छु तिम्रो दशैंको बधाइ
तिमी स्नेहले हेरिराख्नू मलाई ।।

०००
कमलपाेखरी, काठमाडाैं