नेपाली हास्यव्यङ्ग्य अनलाइन पत्रिका

मुकुन्द आचार्य :

गृहमन्त्रीज्यू !
तपाईंलाई धेरै धेरै धन्यवाद !
झण्डै मेरो घर परिवार
भएको बर्वाद !
के मेरा पति मेरा मात्र पनि हुन् ?
उनी देशका उद्योगपति पनि हुन् !
कतिपय बारवालाका
उपपति र सहपति पनि हुन् !
पहिले त सधैं उनी
बार-रेष्टुराँ र मसाज जान्थे
बारवालाहरूलाई नै उर्वसी अप्सरा ठान्थे !
अचेल त नाै नबज्दै
लुसुक्क घर आइपुग्छन्
रातभरिको काम चाँडै नै
भ्याएर आएँ भन्छन् !
जाँडको सुरमा कहिले त
मलाई पनि जितौरी गन्छन् !
बारवालाभन्दा त
तिमी कता कता राम्री, भन्छन् !
गृहमन्त्री ज्यू !
तपाईंले छोपामारी गरेपछि
राति रंगीन हुने यार
अब दिउँसै रंगीन हुन्छन् रे !
तपाईं‌को सुधारवादी छविले
सगरमाथा पो छुन्छ रे !
मार्क्सवाद र लेनिनवाद‌को
कति राम्रो सम्मिश्रण !
बार र डान्स पनि चलोस्
घर परिवार पनि फलोस् फुलोस् !
होटल संचालकले पनि
तपाईंकोमा सुटुक्क ब्रिफकेस हुलोस् !
जे होस् हाम्रो घर हाम्रो संस्कृति
दुवैलाई तपाईंले अक्कल भिडाएर
जोगाउनु भयो ! नाङ्गै नाच्ने बारवालालाई पनि
एकै छिनलाई भए पनि
पेन्टी र ब्रा लाइदिन
सफल हुनु भयो !
गृहमन्त्रीज्यू ! तपाईंको जय होस् !
बार मसाज दोहरी र रेस्टुराँमा
दिउँसै सबैले भ्याउने गरी
समयतालिका सार्वजनिक गरियोस् !
नयाँ नेपाल यसैगरी बनोस् !

०००
जाेरपाटी, काठमाडाैं