नेपाली हास्यव्यङ्ग्य अनलाइन पत्रिका

सालिकराम दाहाल :

सन्तान भाँड्यौ परिवार तोड्यौ
के भो सुबाटो पनि हिंड्न छोड्यौ
सोझा थिचेको उपयुुक्त छैन
बिग्रेछ तिम्रो मति सुध्रिदैन ।१ ।

डाका लुटेरा ठग साथ लिन्छौ
सोझाहरूमा अति कष्ट दिन्छौ
यो काम तिम्रो उपयुुक्त छैन
बिग्रेछ तिम्रो मति सुध्रिदैन ।२ ।

जान्दारहेछौ अति जालझेल
फोहोरमैलातिर खेल्न खेल
त्यो गर्नुपर्ने उपयुक्त छैन
बिग्रेछ तिम्रो मति सुध्रिदैन ।३ ।

खाली उडन्ते गफगर्न थाल्छौ
हाम्रा बगैंचातिर हात हाल्छौ
राम्रो त यौटा पनि काम छैन
बिग्रेछ तिम्रो मति सुध्रिँदैन ।४ ।

झम्टेर सोझा जनलाई मार्छौ
राम्रोछु भन्दै कति स्वाङ पार्छौ
भन्छौ गरेको अपराध छैन
बिग्रेछ तिम्रो मति सुध्रिदैन ।५ ।

कालो छ तिम्रो मनभित्र धेर
फाल्ने पखाल्ने कसरी झिकेर
सङ्केत राम्रो अझ देखिंदैन
बिग्रेछ तिम्रो मति सुध्रिदैन ।६ ।

रित्तिन्छ मान्छे दिउँसै लुटेर
मारिन्छ सोझा किन हो कुटेर
के कर्म यस्तो घिन लाज छैन ?
बिग्रेछ तिम्रो मति सुध्रिदैन ।७ ।

०००
चाँगुनारायण, भक्तपुर