नेपाली हास्यव्यङ्ग्य अनलाइन पत्रिका

हाेम सुवेदी :

गणतन्त्र निर्विकल्प मन्त्र रटाऊ न
जनताका छोरालाई कतार पठाऊ न
तिघ्रा ठटाऊ न नेताज्यू तिघ्रा ठटाऊ न
जनताका छोरालाई कतार पठाऊ न
नेताज्यू कतार पठाऊ न ।।

आफ्नो छोराछोरी डाक्टर बनाई
आफन्त सबैको भाउ बढाई
जनताका छोरालाई ता डाँडो कटाऊ न
झोले लम्पटलाई जुठो चटाऊ न
तिघ्रा ठटाऊ न नेताज्यू तिघ्रा ठटाऊ न
जनताका छोरालाई कतार पठाऊ न
नेताज्यू कतार पठाऊ न ।।

विरोधीको डँडाल्नामा सुम्लो बसाई
सकेसम्म तिनलाई तल भसाई
बाटोबाट काँडालाई पर हटाऊ न
विरोधीलाई ठेगान लाउन झोले खटाऊ न
तिघ्रा ठटाऊ न नेताज्यू तिघ्रा ठटाऊ न
जनताको छोरालाई कतार पठाऊ न
नेताज्यू कतार पठाऊ न ।।

गणतन्त्र निर्विकल्प मन्त्र रटाई
विरोधीको माथिबाट एक फुट घटाई
आफ्नो स्वार्थ सिद्ध गर्न झोले उठाऊ न
विरोधीलाई ठेगान लाउन झोले खटाऊ न
तिघ्रा ठटाऊ न नेताज्यू तिघ्रा ठटाऊ न
जनताको छोरालाई कतार पठाऊ न
नेताज्यू कतार पठाऊ न ।।

०००
भद्रपुर, झापा