नेपाली हास्यव्यङ्ग्य अनलाइन पत्रिका

खगेन्द्र नेउपाने :

तिमी मनोबल देउ या नदेउ
या मनलाग्दो अपमान गर
या हामीलाई अमर्यादित परिभाषा गर
नबल्नु बलिसकेपछि
पुरै पग्लिएर विश्राम लिनेछौं ।

हिजो तिमीले नै हो हामीलाई उक्साएको
स्वतन्त्रता र न्यायको नारा दिएर
हाम्रा झुप्राहरुमा
अन्यायका विरुद्ध
न्यायको कुपी बाल्न लगाएको
हामीले त्यसै गर्यौं
हरेक झुप्रा बलेंसीबाट छिरेर
मझेरी र मूल ओछ्यानमै बसेर
अन्यायका विरुद्ध विगुल बजायौं
त्यसका विरुद्ध तिमीलाई अघि सार्यौं
तिनलाई झार्यौं र तिम्लाई त्यहाँ पुर्यायौं
तर आज
तिम्रा घुस्याहा कर्मचारीको चटनी चाटेर
तिम्रा जाली ठेकेदारको केक काटेर
हामीलाई अपमानित नाम दिन्छौ भने
हामीलाई असभ्यता पस्किन्छौ भने
हामी पनि स्वभिमानको परीक्षा दिनेछौं
नबल्नु बलिसकेपछि
पुरै पग्लिएर विश्राम लिनेछौं ।

होला ,हामी पनि दोषी छौं होला
तर बेइमान छैनौं
परिवर्तन हाम्रो पनि चाहना हो
यस प्रति कुठाराघात गर्दैनौं
तिमी अगुवा हौ
तर मालिक होइनौ
पद प्रतिष्ठा र पावरको
महाभारत या शिवालिक होइनौ
रै पनि
तिमीलाई यस्तो लाग्छ भने
तिमी आफ्नै दम्भमा रमाइराख
हामी नबल्नु बलिसके पछि
पुरै पग्लिएर बिश्राम लिनेछौं ।

०००
गाैरादह, झापा