नेपाली हास्यव्यङ्ग्य अनलाइन पत्रिका

रमेश खकुरेल :

ढसमस्स बसेको छ साढे सडक बीचमा
कैलो साँढे टल्किएको कालो सडक पीचमा ।

काठमाडौँ राजधानी जता हेन्यो उतैतिर
सवारी दौडिएका छन् मोटरमाथि मोटर ।

तिल राख्ने ठाउँ छैन यता पेटी उता ढल
जाम लाग्यो सडकमा मच्चियो खु खलबल ।

पाँ पाँ पूँ पूँ बजे बाजा टीँ टर्टी को सुर साथमा
प्रहरी हल्लदै आयो डण्डा एक छ हातमा ।

यौटा मोटरको चुच्चो अलि बाङ्गो भयो यता
अर्को मोटरको पा‌ङ्ग्रा घुम्यो अलि कता उता ।

दुवै चालकका लागि प्रहरी काल झै भयो
लाइसेन्स यता ले ले भन्दै गर्जेर डुक्रियो ।

बिचरा चालकहरू जोड्दछन् हात नम्र भै
भन्छन् हाम्रो छैन गल्ती अड्‌यौ लाचार मात्र ।

बाटो रोकेछ साँढेले जे हुने उसमाथि होस्
हजुरको दया लागोस् हामीमाथि निगाह होस् ।

प्रहरी गर्जियो फेरि … जान्ने नहो बढी …
बडो ठूलो भएँ भन्छस् यौटा मोटरमा चढी ।

के तँलाई छैन थाहा कि जानी अनजान छस्
लाइसेन्स हुँदै हुन्न साँढेको अनि के झरोस् ।

तिमीलाई समाते पो झर्ला बियर बोतल
साँढेको के समातेर गर्ने खातल खोतल ।

०००
खित्कै खित्का (गाईजात्रा २०५३)