नेपाली हास्यव्यङ्ग्य अनलाइन पत्रिका

कविताको अर्गानिक झोलमा
कविताको नयाँ मात खोजिरहेका कविहरू
कवि कुनामा बसेर
प्वाल परेका सिद्धान्तहरू धुँवामा उडाउँदै
कविताको आरति गरिरहेका छन् ।
आफ्नै प्रशंसाको डम्फु बजाईरहेका केही कविहरू
अचेल शोकमा देखिन्छन्
अर्गानिक झोल चढाएर
कविताको अप्रेसन गरिरहेका डाक्टरहरू देखेर ।

अप्रेसनको पर्खाईमा बसेर मुटुको धड्कन जाँचिरहेका
ती कविहरू बेहोसीको ईन्जेक्सन पछिको
समयको आश मेटाइसकेका छन् ।

अर्गानिक झोलको डोज बिस्तारै बढाएर
भटमास र खुर्सानीले मुख रन्काउँदै
सिनियरिटीको पोस्ट दाबी गर्दै
अस्मिता भाउजूको टेबुल आज बज्रिएको छ ।
कवि कुनामा कविताको बहस जारी छ ।

हत्केलाको खाँबोमा भीर जस्तो चिउँडो टेकाएर
ध्यानले सुनिरहेका एक कविले
बीचैमा प्रस्ताव राख्छन्
छानबिन समितिको लागि ।

कविताका मापदण्डहरू नयाँ बन्छन्
स्त्रीको तिघ्रा, स्तन र ब्युटीबोनको सौन्दर्यमा
मात्र केन्द्रित सौखिनलाई नोमिनेसनमै नपार्ने ।

पुरुष कविलाई देखिनसक्ने
केवल कबयत्रीको स्तुति र केशमा
सधै पिङ् खेल्ने कवि महासयलाई पुनर्विचार गर्ने ।

पुरानो धमिराले प्वाल पारेको
केही परजीवीले गुण बनाएको
कविता सार्दै छाति फुलाएर भाषण गर्नेलाई
समितिमा छलफल गरिराख्ने ।

अचेल धेरै चलखेल मच्चाएका
अर्गानिकको झोल र अस्मिता भाउजूका
नियमित ग्राहक कविहरूलाई
विशेष प्रथामिकतामा पर्ने कुराको
सहमतिमा पहिलो चरणको बैठकलाई
टुङ्ग्याउँदै केही थान कविहरू बिदा हुन्छन् ।

दुईवटा कविता लेखेकै भरमा
साधारण सदस्यताको निवेदन पार्दै
समितिमा दर्ता गराउने सोच बनाउँदै
अस्मिता भाउजूलाई सिफारिसको
निमित्त म दाउ हेरिरहेको छु ।